Федерация Кенгаши АҚШ Қозоғистон орқали Россиядаги сайловларга аралашганини аниқлади

Россиялик сенаторлар Россияда 10 сентябрь куни бўлиб ўтган ҳудудий сайловларга АҚШ аралашганлиги ҳолатларини аниқлади, деб ёзади Meduza. Бу ҳақда Федерация Кенгашининг давлат суверенитети ва Россия ички ишларига аралашув олдини олиш комиссияси раҳбари Андрей Климов маълум қилган.

Унинг даъво қилишича, «Росфинмониторинг» АҚШ ҳудуд раҳбари сайловларида муайян номзодларни қўллаб-қувватлаш учун Россияга пул жўнатгани ҳақидаги далилларни тақдим этган.

Климов, шунингдек, пуллар Евросиё иқтисодий иттифоқига аъзо бўлган, «чет эл агентлари ҳақидаги қонун бўлмаган» мамлакат орқали ўтказилганини айтди. «РБК» манбалари бу мамлакат Қозоғистон эканлигини таъкидламоқда.

Шу билан бирга, Климов пулларни қабул қилиб олган аниқ бир компания ёки номзодлар исмини айтмади.

Россиядаги сайловларга бундай таъсир ўтказиш олдини олиш учун Климов номзодларнинг қўш фуқароликка эга россияликларни ваколатли шахс этиб тайинлашларини тақиқлашни таклиф қилди.