Жиззах вилоятида жиноятчилик ва ҳуқуқбузарликларнинг олдини олиш, аҳоли ўртасида профилактика ишларини кучайтириш мақсадида сайёр судлар ўтказилмоқда. Шундай тадбирлардан бири Шароф Рашидов туманидаги «Тоқчилик» маҳалла фуқаролар йиғини идорасида бўлиб ўтди. Бу ҳақда ЎзА хабар берди.
Сайёр судда ушбу маҳаллада яшовчи фуқаро Ихтиёр Қурбоновнинг жиноий иши кўриб чиқилди. Беш фарзанднинг отаси, ёши элликни қоралаб қолган бу фуқаро бундан беш йил аввал ҳам судланиб, уч йилга озодликдан маҳрум этилган. Аммо унга нисбатан амнистия акти қўлланиб, жазони ўташдан муддатидан олдин озод қилинган.
Жорий йилнинг июнь ойида туман ички ишлар ва терроризмга қарши кураш бўлимлари томонидан ўтказилган «Қорадори — 2017» тадбири давомида Ихтиёр Қурбоновнинг ҳовлисида каннабис гиёҳвандлик ўсимлиги ўстирилаётгани ҳамда истеъмол учун қуритиб, тайёрлаб қўйилгани аниқланди. Суриштирув ва тергов давомида у барча айбларини бўйнига олди.
Жиноят ишлари бўйича Шароф Рашидов тумани судининг сайёр суд мажлисида Ихтиёр Қурбоновнинг айбига тўлиқ иқрорлиги, қилмишидан чин кўнгилдан пушаймонлиги, оиласида ягона боқувчи экани инобатга олиниб, унга нисбатан бир йил озодликдан маҳрум этиш жазоси тайинланди.
Изоҳ (0)