Тоғли ҳудудларда 30 минг гектар ёнғоқзор барпо этилади

Ўзбекистоннинг тоғли ҳудудларида 30 минг гектар ёнғоқзор барпо этиш бўйича ишлар бошлаб юборилди. Бу ҳақда ЎзА хабар бермоқда.

Лалми ерлардан фойдаланишни рағбатлантириш ва самарадорлигини янада ошириш, ички ва ташқи бозорларда рақобатбардош бўлган ёнғоқ ишлаб чиқариш ҳажмини кўпайтиришда Президентнинг 1 июндаги «Ёнғоқ ишлаб чиқарувчилар ва экспорт қилувчилар уюшмасини тузиш ва унинг фаолиятини ташкил этиш тўғрисида»ги қарори асос бўлмоқда.

Мамлакатнинг тоғли ҳудудлари иқлим шароити ёнғоқ, бодом, писта каби дарахт кўчатларининг ўсиши ва юқори ҳосил бериши учун нисбатан қулай жойлар ҳисобланади. Жумладан, Самарқанд, Навоий, Қашқадарё, Сурхондарё, Тошкент каби вилоятлар ва Фарғона водийсида бу каби дарахтлардан мўл ҳосил олиш мумкин.

Бўстонлиқ тоғ илмий-тажриба станциясида ёнғоқнинг танлаб ажратилган 15 нави, пайванд йўли билан етиштирилган 100 хилдаги истиқболли формалари парваришланмоқда. Жорий йилнинг баҳорида беш минг туп «Ўзбекистон тезпишари», «Идеал» каби ёнғоқ кўчатлари жойларга етказиб берилди. Кузда экиш учун маҳаллий навлардан яна 4 минг туп кўчат тайёрлаб қўйилди.