Беларуснинг «Амкодор» компанияси Афғонистон бозорига чиқиш вариантларини кўриб чиқмоқда. Бу ҳақда компаниянинг МДҲ мамлакатлари ва узоқ хорижга сотиш бошқармаси бошлиғи Леонид Пинчук корхонага Афғонистон ижроия ҳокимияти раҳбари Абдулла Абдулланинг ташрифи чоғида айтиб ўтди, деб ёзади «Belta.by».
««Амкодор»нинг Афғонистон ҳудудида савдо вакиллари йўқ, аммо биз бу масалани ҳал қилиш жараёнидамиз. Бу йил қўшни Тожикистонда дилеримиз пайдо бўлди. Афғонистон бозорига киришнинг бир нечта вариантлари кўриб чиқилмоқда, шу жумладан, Тожикистондаги дилер орқали ёки Ўзбекистондаги йиғиш корхонаси техникасини сотиш орқали», — деди Леонид Пинчук.
Тошкентдаги йиғиш корхонасида айни пайтда «Амкодор»нинг бешта моделдаги техникаси ишлаб чиқарилади. Бошқарма бошлиғи сўзларига кўра, бу корхона Ўрта Осиё мамлакатлари — Афғонистон, Тожикистон, Туркманистон, Ўзбекистон, Покистон кабилар талабларини қондириш учун яратилган. «Логистика нуқтаи назаридан, техникани Ўзбекистонда ишлаб чиқариш ва қўшни мамлакатларга сотиш арзонроққа тушади. Чунки техника машина комплектлари кўринишида етказиб берилади, солиқ преференциялари кўзда тутилган», — деди у.
Изоҳ (0)