2018 йил 1 июлга қадар Ўзбекистоннинг мобил операторлари сўмлик тариф режаларига ўтади. Бу ҳақда 16 август куни Халқаро пресс-клубда ўтган йиғилишда ахборот технологиялари вазири вазифасини бажарувчи Шерзод Шерматов баёнот берди, деб хабар қилади Uz24.
Унинг айтишича, операторлар кўрсатилган муддатга қадар биллинг тизимини ҳам қайта кўриб чиқиши лозим.
«Биз сўмлик тарифларга ўтиш вазифасини қўйганимизда мобил операторлар, ўз навбатида, биллинг тизимларини қайта кўриб чиқиш муаммосини айтди. Уларга 2018 йил 1 июлига қадар мухлат берилди», — деди Шерматов.
Unitel МЧЖ бош директори Дмитрий Шуков ҳозир Beeline сўм тарификациясига тўлиқ ўтишга тайёрланаётганини айтиб ўтди.
«Долларлик тариф фақат калкуляция учун ишлатилади. Аслида, Ўзбекистон ҳудудидаги барча хизматларда бўлганидай, битта валюта — ўзбек сўми ишлатилади» — деди Шуков.