Украиналик жарроҳлар бир операцияда уч технологиядан фойдаланди

Киевдаги Ромоданов номли нейрожарроҳлик институти шифокорлари бош мия ўсимтасини олиб ташлаш бўйича мураккаб операцияни ўтказди. Бу ҳақда «Корреспондент.net» хабар бермоқда.

Бир операцияда бирйўла уч технология — эндоскопия, компьютер навигацияси ва лазер аралашувидан фойдаланилди. Шу пайтга қадар бунга ҳеч ким қўл урмаганди.

Бемор бош оғриғи ва қўл-оёқ ҳаракатларидаги қийинчиликлардан нолирди. Ўсимта асаб толаларига босим ўтказгани сабабли у исталган пайт фалаж бўлиб қолиши мумкин эди. Операциянинг асосий мураккаблиги ҳам шундан иборат бўлди.

Бироқ натижа кутилганидан аъло бўлди. Операция давомида деярли қон йўқотилмаганлиги сабабли бемор жарроҳлик амалиётидан сўнг одатдагидек жонлантириш бўлимига эмас, умумий палатага ўтказилди.