Ипак йўли ва генетика олимларга олманинг ватанини топишга ёрдам берди

Барча навлардаги олмаларнинг ватани Қозоғистон ёки Хитой шимоли-ғарбидир. Олманинг дунё бўйлаб тарқалишига Буюк Ипак йўли ёрдам берган. Бу маълумотлар Nature Communications журналида чоп этилган мақолада айтилди, деб хабар беради «РИА Новости».

«Биз олманинг ватани қидирувларини бутун Ўрта Осиёдан Қозоғистоннинг кичик қисми ҳамда Тянь-Шаннинг Хитойдаги ғарбий қисмигача қисқартиришга эришдик. Бундан ташқари, биз мева эволюцияси ҳамда унинг Ипак йўли орқали шарқдан ғарбга тарқалишини кузатдик ҳамда олма таъми ва шакли ушбу саёҳатнинг ҳар қадамида алмашганини аниқладик», — деди Итакадаги (АҚШ) Корнелл университети хоодими Чжанцзюнь Фэй.

Маълумки, олмалар анча кеч хонакилаштирилган бўлиб, атиги 4 минг ёшдадир. Қадимги юнон манбаларига кўра, бу мевалар Александр Македонскийнинг ўзи томонидан хонакилаштирилган. Афсонага кўра, у мазкур мева дарахтини Сўғдиёнадан олиб кетган.