Буркина-Фасода жиҳодчилар қаҳвахонага ҳужум қилди, 17 киши ҳалок бўлди

Буркина-Фасодаги қаҳвахонага ҳужумда 17 киши қурбон бўлди, саккиз киши жароҳатланди, деб ёзади «РИА Новости» алоқа вазири Реми Данжинуга таяниб.

Ҳалок бўлганлар ва яраланганларнинг қайси давлат фуқаролари эканлиги номаълум. Данжину жабрланганлар «турли миллатлар вакиллари» эканлигини айтди.

Бундан ташқари, алоқа вазири маълум қилишича, ҳукумат текширув ишларини бошлаган. Хавфсизлик кучлари мамлакат аҳолисини осойишталикни сақлаб, бу даҳага яқинлашмасликни сўради.

Уч эркак маҳаллий вақт билан 21:30 (Тошкент вақти билан 02:30)да «Истанбул» қаҳвахонасига келиб, айвонда ўтирган хўрандаларни ўққа тутган. Шундан сўнг армия жиноятчиларга қарши операция бошлади, отишма юзага келди.