«Биринчи канал» Дмитрий Борисов иштирокидаги «Пусть говорят» кўрсатуви анонсини чиқарди (видео)
«Биринчи канал» «Пусть говорят» дастурининг бошловчи Дмитрий Борисов иштирокидаги сони анонсини чиқарди, деб ёзади Afisha Daily. Борисов томошабинлар қаршисида ким сифатида намоён бўлиши айтилмаяпти. Кўрсатув душанба куни Тошкент вақти билан 21:50 да эфирга чиқади.
Аввалроқ Россиянинг «Биринчи канали»даги энг машҳур шоулардан бири — «Пусть говорят» дастури жамоаси ишдан кетгани хабар берилган эди. «РБК» маълумотларига кўра, Малахов «Биринчи канал»дан кетиб, «Россия 1» телеканалига ўтади. Бундай қарорга эса Константин Эрнст таклиф қилган янги продюсер туфайли «Пусть говорят» жамоаси ичида низо келиб чиққани сабаб бўлган.
Малаховнинг рафиқаси Наталья Шкулева раҳбарлик қиладиган Elle журнали эса бошловчини декрет таътилига чиқаришмагани учун, у «Биринчи канал»дан кетаётгани ҳақида ёзди. Бошловчи фарзанди туғилганидан кейин уни парвариш қилиш учун таътилга чиқиш истагини билдирганида ток-шоу продюсери кўрсатув болалар боғчаси эмаслигини, ё бошловчилик, ё энагаликни танлаши кераклигини айтган. Шундан сўнг гўёки, Малахов ишдан бўшаш ҳақида ариза берган.
