«Пахтакор»нинг ҳомийлари қаторида тугатилган «Камолот» кўриниб қолди. Клуб бу ҳолат бўйича алоҳида тушунтириш беришга мажбур бўлди

«Пахтакор» футбол клуби 10 август куни янги футболчи билан шартнома имзолаши муносабати билан матбуот анжумани ўтказди. Матбуот анжуманидаги клуб ҳомийлари ва ҳамкорлари акс этган баннер ижтимоий тармоқ фойдаланувчилари ва спортга ихтисослашган сайтлар эътиборини тортди.

Баннерларда фаолияти 30 июнь куни тугатилган «Камолот» ёшлар ижтимоий ҳаракатининг ҳам логотипи борлиги фойдаланувчилардан савол туғдирди (тугатилган ҳаракат ўрнида, Ўзбекистон Президенти таклифига кўра, Ёшлар иттифоқи номли янги ташкилот тузилган).

«Суперклубга айланиш йўлида катта миқдорда пул сарфлаб, янги футболчилар сотиб олаётган ‘Пахтакоръда баннерни алмаштириш учун пул йўқми ё клуб Президент қароридан бехабарми?», — деб «Пахтакор»га савол билан мурожаат қилган сайтларнинг бири.

«Пахтакор» матбуот хизмати «ижтимоий тармоқ фойдаланувчиларининг изоҳларини қизиқиш билан ўрганиши ва уларнинг талабларини ҳисобга олиши»ни маълум қилиб, жамоатчиликда пайдо бўлган саволлар бўйича тушунтириш берди.

«Пахтакор» футбол клуби «Камолот» ёшлар ижтимоий ҳаракати билан узоқ ва фойдали ҳамкорлик қилиб келади. Ҳаракат рамзидан клубнинг барча расмий тадбирларида фойдаланади.

Ёшлар иттифоқи раҳбариятига рамзни алмаштириш юзасидан мурожаат этилганда, «Камолот» ҳаракатини Ўзбекистон Ёшлар иттифоқига айлантириш юзасидан қарор қабул қилингач, ташкилотнинг янги рамзини ишлаб чиқиш учун танлов эълон қилингани ҳақида жавоб олинди.

Бугунги кунда Ёшлар иттифоқи раҳбарияти томонидан таклифлар кўриб чиқилмоқда. Бу жараёнда энг маъқул рамз танлаб олинади. Сўнг у Ўзбекистон Адлия Вазирлиги томонидан тасдиқланиши керак.

«Камолот» бизнинг ҳамкоримиз ҳисобланади ва, келишувга кўра, биз унинг рамзидан янги рамз расман тасдиқланмагунча турли реклама ва расмий баннерларимизда фойдаланишимиз лозим.

Янги рамз тақдим этилгунига қадар «Пахтакор» футбол клуби эски рамздан фойдаланиб туради. Расмий тасдиқдан сўнг, баннерларга Ўзбекистон Ёшлар иттифоқи рамзи жойлаштирилади.

«Пахтакор» ФК баёнотидан