Париж яқинида ҳарбийларга ҳужум қилган кишининг шахси аниқланди

Франция полицияси Париж четида ҳарбийлар гуруҳи устига машина ҳайдаган кишининг шахсини аниқлади. Бу ҳақда «Интерфакс» хабар бермоқда.

Айтилишича, жиноятчи жазоирлик 37 ёшли Хаму Бенлатреш бўлиб, у Францияда қонуний асосда истиқомат қилиб келади.

Бенлатреш ҳуқуқ-тартибот органларига майда қонунбузарликлар туфайли маълум, лекин у ҳеч қачон жавобгарликка тортилмаган.

Бенлатреш Париждан шимолроқдаги Безон шаҳрида истиқомат қилади.

Илгари хабар қилинганидек, 9 август куни Парижнинг четидаги Леваллуа-Перре мавзесида машина кўчаларда патруль хизматини ўтаётган олти нафар ҳарбийни уриб кетди. Ҳарбий хизматчилар жароҳат олди, уларнинг икки нафари оғир аҳволда.