Чемпионат стартига 4 ҳафта бор. «Бавария»нинг бутун мавсум учун барча чиптаси сотиб бўлинди

Мюнхеннинг «Бавария» клуби янги мавсум учун чиқарган чипталарининг барчасини сотиб тугатди. Бу ҳақда «Чемпионат» нашри хабар берди.

Германиянинг энг шонли клуби ўз абонементларини сотиш тезлиги борасида дунёнинг энг яхши кўрсаткичини бир неча йиллардан буён қайд этиб келади.

Бундеслигада чемпионат «Бавария» ва «Боруссия Дортмунт» клублари ўртасидаги Суперкубок ўйини билан очилади. Мюнхенликлар мамлакат чемпиони сифатида, дортмундликлар эса кубокдаги муваффақият сабаб Суперкубокда иштирок этади. Мазкур учрашувни томоша қилиш истагида бўлган мухлислар сони 210 мингдан ошиб кетди, деб ёзган немис нашрлари. Ваҳоланки, унга мезбонлик қиладиган «Сигнал Идуна Парк» ўз бағрига 75 минг ишқибознигина сиғдира олади.

Суперкубокдан кейин «Бавария» Бундеслига доирасида йил бўйи 34 та ўйин ўтказади. Клуб мухлислари уй ва сафар учрашувлари учун сотувга чиқарилган барча чипталарни мавсум стартига 4 ҳафта қолганида сотиб олишди. Унча кўп бўлмаган ҳар бир ўйиннинг алоҳида чипталари ўйин кунлари сотувга чиқади.