Немцовнинг қотили 20 йиллик қамоқ жазосига ҳукм этилди

Москва округ ҳарбий суди мухолиф сиёсатчи Борис Немцовнинг қотиллиги ҳақидаги иш юзасидан ҳукм ўқиди. Бу ҳақда Meduza хабар бермоқда.

Суд томонидан қотилликнинг бевосита иштирокчиси деб тан олинган Заур Дадаев оғир тартибли колонияда ўташ шарти билан 20 йиллик қамоқ жазосига ҳукм этилди. Эслатиб ўтамиз, айблов унга умрбод жазо белгилашни сўраган эди.

Шунингдек, у лейтенант унвонидан ҳамда Жасорат орденидан маҳрум қилинди.

Иш бўйича айбдор деб топилган бошқа шахсларга ҳам қамоқ муддатлари белгиланди: Анзор Губашев оғир тартибли колонияда ўташ шарти билан 19 йиллик, унинг укаси Шадид 16 йиллик қамоқ жазосига ҳукм қилинди.

Шунингдек, Темирлан Эскерханов оғир тартибли колонияда ўташ шарти билан 14 йилга қамаладиган бўлди. Хамзат Бахаев 11 йиллик жазо олди.

Судланувчилар айбларини тан олмади. Уларнинг адвокатлари апелляцияга беришга ҳозирланмоқда.