Наманган шаҳрининг янги ҳокими фаолиятини маҳаллалардаги аҳоли хонадонларидан бошлади

Наманган шаҳар ҳокими этиб тайинланган Шавкатжон Абдураззоқов фаолиятини маҳаллалардаги вазиятни шахсан ўрганишдан бошлади. Бу ҳақда шаҳар ҳокимлиги ахборот хизматига таяниб, «Дарё» мухбири хабар бермоқда.

Ҳоким «Чаманзор» маҳалласида бўлиб, ўндан ортиқ хонадон эгалари билан суҳбатлашди. Унга коммунал хизмат, соғлиқни сақлаш, таълим, банк, солиқ, молия, бандликка кўмаклашиш, кадастр идоралари, «Маҳалла» жамғармаси ва Ёшлар иттифоқи шаҳар кенгаши вакиллари ҳамроҳлик қилди.

Асаларичилик билан шуғулланувчи Жобир Ҳолиқовнинг кредит борасида мурожаати жойнинг ўзида кўриб чиқилиб, Халқ банкига имтиёзли кредит ажратиш вазифаси топширилди. Хонадонини кадастр қилиш борасида бюрократик тўсиқларга учраётган Розиқжон Саттаровнинг муаммоаси шаҳар кадастр идораси вакили томонидан ҳал этилди.

Матлуба Зокирова ва Мунаввар Инамоваларнинг оилаларига 20 тадан парранда бир ойлик озуқаси билан топширилди. Шунингдек, аҳолининг электр энергия устунини ўрнатиш, канализация муаммосини ҳал қилиш борасидаги мурожаатлари юзасидан аниқ топшириқлар берилди. 

Ҳоким хонадонларни ўрганаётган пайтда унга иш сўраб мурожаат қилган Хайрулло Юсупов ва Фахриддин Абдуллаев эса иш билан таъминланди.

Худди шундай тадбирлар бир пайтнинг ўзида шаҳарнинг «Заркент», «Маданий маориф» ва «Ишонч» маҳалларида шаҳар прокурори, ИИБ ва ДСИ раҳбарлари томонидан амалга оширилди. Эрталабдан то куннинг биринчи ярмигача 4 та гуруҳ томонидан жами 300 дан ошиқ мурожаатнинг ижобий ечими топилди.