«Бунёдкор» собиқ футболчиларини қайтаришни бошлади: Шодиев, Собирхўжаев ва Ғофуров клубда

Тошкентнинг «Бунёдкор» клуби ҳужумчи Воҳид Шодиев билан шартнома имзолади, деб ёзди «Championat.asia» нашри.

Бунда шартнома қанчага мўлжаллангани айтилмаган. Маълум томони Шодиев Малайзиядаги фаолиятидан кейин Навоийнинг «Қизилқум» клуби сафида тўп сураётганди. Бунда унинг «Қизилқум» билан шартномаси қандай кўринишда бўлгани айтилмаган.

Воҳид Шодиев Миржалол Қосимов Ўзбекистон миллий термасига бош мураббий бўлган вақтда бош жамоага ҳам чақирилган бўлиб, 2015 йилги Осиё кубогида Саудия Арабистони дарвозасига гол уришга муваффақ бўлганди.

Шунингдек, сўнгги 1 йилини «Обод» клубида ўтказган ҳимоячи Анвар Ғофуров «қалдирғочлар» машғулотига келиб қўшилган. Аввалроқ «Обод» футболчилари эркин агент сифатида қўйиб юборилганди айтилганди.

Мавсумнинг 1-даврасини «Шўртан»да ўтказган ярим ҳимоячи Сардор Собирхўжаев ҳам Миржалол Қосимов қўли остига етиб келган. Катта эҳтимол билан бу футболчилар «Бунёдкор» билан янги келишувга эришади.

Маълумот учун, «Бунёдкор» футболчилари 2-даврага тайёргарликни Чимёндаги «Арчазор» масканида давом эттирмоқда.