1990-йиллар охирида Канаданинг Галифакс шаҳрида яшовчи Стив Морсхед noreply@eastlink.cа манзили бўйича электрон почта очган. Ўша вақтда рўйхатдан ўтишда ҳеч қандай муаммо бўлмаган. Орадан 20 йил ўтиб компания канадаликка унинг почтасини олиб қўйишини маълум қилган, деб хабар берди Meduza.
Стив 7 июнь куни ўз почтасининг сервери сақланадиган Eastlink компаниясидан хат олган, унга кўра Стивнинг барча хатлари бир ой давомида ўчириб ташланади. Хатда айтилишича, бу каби манзиллар авваллари янгилик ҳисобланган бўлса, ҳозирда бу одамларни чалғитиши мумкин. Ҳозирда noreply@xxxxx.yy кўринишидаги манзиллардан асосан офис хизматлари фойдаланади — улардан сервислар жавоб талаб қилинмайдиган хабарлар, ҳисоблар ва шу каби бошқа нарсалар юборилади.
Стив Морсхед ўзини ҳақоратга учраган деб ҳисобламоқда: агарда бу каби манзиллардан фойдаланиш хавфли эканлиги борасида 20 йил олдин огоҳлантирилганида ҳозирги вазиятга тушиб қолмаган бўларди.
Канадаликнинг сўзларига кўра, у йигирма йил давомида ўз электрон почтаси манзилидан банклар, эълонлар сервислари, дўконлар ва бошқа юзлаб жойлар учун фойдаланган. Бундан ташқари, айни вақтда у уйини сотмоқда ва почтанинг ўчириб юборилиши ўринсиз.
«20 йил давомида почтадан фойдаландим, компания вакиллари буталар ичидан чиқиб келиб менга 20 йил давомидаги ёзишмаларим ичидан ўзимга кераклиларини сақлаб қолишим учун 30 кун вақт беришини айтишини номақбул ҳисоблайман», — деди Стив Морсхед.
Фойдаланувчининг сўзларига кўра, компания унинг архивини бошқа почтага ўтказиб беришдан ҳам бош тортган. Eastlink’нинг журналистларга хабар беришича, улар бу масалада Стивга ёрдам беришга тайёр.
Стив Морсхеднинг сўзлашича, унинг хотини Eastlink компаниясини раҳбарига хат ёзганидан кейин почтани ўчириш ҳақида хабар келган. Улар шу орқали ҳозирда кенг тарқалган noreply манзили компанияга эмас, балки фойдаланувчига тегишли эканлигини билиб қолган бўлиши мумкин.
Изоҳ (0)