АҚШ президенти Дональд Трамп Гамбургда бўлиб ўтган G20 саммити доирасида Россия давлат раҳбари Владимир Путин билан учрашувини «ҳайратланарли» деб атади. Бу ҳақда «РБК» хабар бермоқда.
АҚШ етакчиси Путин билан учрашув таассуротлари ҳақида шанба куни тонгда Буюк Британия бош вазири Тереза Мей билан бўлиб ўтган учрашув чоғида айтиб ўтган.
CNN журналисти Жефф Зелени Америка президенти Путин билан учрашувини қандай таърифлагани ҳақида Twitter’даги саҳифасида ёзиб қолдирган. «Президент Путин билан ҳайратланарли учрашув бўлиб ўтди», — деб, Трампнинг сўзларидан иқтибос келтирди журналист.
АҚШ давлат котиби Рекс Тиллерсоннинг сўзларига кўра, Путин ва Трамп ўзларининг илк учрашувида «жуда тез тил топишиб кетди», улар ўртасида «ижобий бир химия» юзага келган. Тиллерсон икки давлат раҳбарлари мулоқотини самимий ўтганини таъкидлади.
Путин ва Трампнинг дастлабки учрашуви ёпиқ эшиклар ортида бўлиб ўтди. Учрашув икки соатдан ортиқ давом этди: «Интерфакс» учрашув 2 соат 15 дақиқа ўтгани ҳақида ёзди, «РИА Новости» эса 2 соат 20 дақиқа деб чиқди, Reuters эса АҚШ давлат департаментидаги манбага асосланиб, музокаралар икки ярим соат давом этганини маълум қилди.
Изоҳ (0)