Ким Чен Ин қитъалараро ракетани яратганлар билан биргаликда бобосининг хотирасини ёд этди

Ким Ир Сеннинг вафот этганига 23 йил тўлиши муносабати билан КХДРда 8 июль, шанба куни маросим бўлиб ўтди, деб хабар берди «ТАСС».

Хабар беришларича, Пхеньянда КХДРнинг «биринчи ва абадий» президенти қабри жойлашган Кимсусан саройига ўн минглаб одам оқиб келмоқда.

Улар орасида Корея меҳнат партияси, Олий халқ кенгаши раҳбарлари, вазирлар маҳкамаси вакиллари, сиёсий ва жамоат ташкилотлари, меҳнат жамоалари, Корея халқ армияси жангчилари, талабалар ва мактаб ўқувчилари ҳам бор.

«Қуёш саройи» дея аталувчи ушбу ёдгорликка биринчи бўлим КХДР етакчиси Ким Чен Ин ярим тундан сўнг ташриф буюрди. Унга Пхеньянга таклиф қилинган, 4 июль куни мамлакатда учирилган «Хвасон-14» қитъалараро баллистик ракетасининг яратувчилари ҳамроҳлик қилди.

Маҳаллий газеталарнинг деярли барча саҳифалари «беқиёс буюк инсон», «Миллат отаси» ва «Абадий чучхе қуёши» мавзусига бағишланган.

1977 йилда гранит ва мармардан қурилган Кимсусан саройи аввалига Ким Ир Сеннинг қароргоҳи сифатида қўлланилган. У бу ерда хорижий давлатлар етакчиларини қабул қилган, партия ҳамда иқтисодий кадрлар билан мажлислар, учрашувлар ўтказган.

1994 йил 8 июлда Ким Ир Сен вафот этгач, сарой мақбарага айлантирилган.