Россия президенти Владимир Путиннинг самолёти 6 июль куни Москвадан G20 саммити бўлиб ўтадиган Гамбург шаҳрига парвоз қиларкан, НАТОга аъзо ҳисобланган Болтиқбўйи мамлакатлари ҳамда Польшани айланиб ўтган. Бу ҳақда FlightRadar24 маълумотларига асосланиб, Reuters агентлиги хабар бермоқда.
Meduza’нинг ёзишича, Россия президентининг самолёти одатдаги йўналиш ўрнига Финляндия ва Швеция ҳаво кенгликларига кирган ҳолда, Германияга Болтиқ денгизи орқали парвоз қилган.
Қайд этишларича, сўнгги бир йил давомида Владимир Путиннинг самолётлари бирор марта Евроиттифоқ мамлакатлари устидан ўтадиган парвозлардан чекинмаган эди. Хусусан, Путин бир неча бор Польша ҳаво кенгликларидан учиб ўтган.
Россия президентининг авиақатнови йўналиши ўзгаришлари сабаблари ҳозирча номаълум. Айни вақтда, Путиннинг матбуот котиби Дмитрий Песков мазкур ахборотга изоҳ беришдан бош тортди.
Маълумот учун, 2017 йилнинг июнь ойида НАТО қирувчи самолётлари бортида Россия мудофаа вазири Сергей Шойгу бўлган лайнерга икки марта яқинлашган эди. Бу воқеалар Болтиқ денгизи осмонида, Шойгу Мудофаа вазирлигининг Калининграддаги йиғилишига бориб, қайтаётганида юз берган эди.
Изоҳ (0)