Ўзбекистон ва Жазоир ўртасида дипломатик алоқалар ўрнатилганига 25 йил тўлди. Сана муносабати билан Жазоирнинг Тошкентдаги Фавқулодда ва мухтор элчиси Носир Бушерит «Жаҳон» ахборот агентлигига интервью берди.

«Жазоир Ўзбекистон мустақиллигини биринчилардан бўлиб тан олган, 1993 йил декабрь ойида эса Тошкентда ўз элчихонасини очган. Ушбу воқеаларнинг тезкорлик билан амалга оширилганлиги Жазоирнинг Ўзбекистон билан ўзаро ҳурматга асосланган ҳамкорлик муносабатларини ўрнатишга бўлган интилишининг яққол намойишидир.

Иккала давлат ташқи сиёсий маҳкамалари ўртасида 2016 йил октябрь ойида имзоланган Ҳамкорлик ва сиёсий маслаҳатлашувлар тўғрисидаги баённома ўзаро алоқаларда янги саҳифа бўлди. Мазкур ҳужжатда белгиланган меъёрларнинг амалга оширилиши, шубҳасиз, иқтисодиётнинг турли йўналишларида ўзаро фойдали ҳамкорликни кенгайтиришнинг улкан истиқболларини очади.

Жазоир Президент Шавкат Мирзиёев ташаббуси билан ишлаб чиқилган 2017–2021 йилларга мўлжалланган тараққиёт стратегиясини катта қизиқиш ва эътибор билан кузатмоқда. Биз Ўзбекистон билан турли соҳаларда ҳамкорликни фаоллаштириш ва икки томонлама ҳамкорлигимизга янги куч бағишлашга тайёр эканимизни яна бир бор тасдиқлаймиз.

Давлатларимиз жуғрофий жиҳатдан турли қитъаларда жойлашганлиги маълум қийинчиликлар туғдиришига қарамай, Жазоир ва Ўзбекистон ҳамкорликни ривожлантириш учун улкан салоҳиятга эга ҳамда бундан албатта фойдаланиш лозим.

Хусусан, Жазоир Ўзбекистонга 40 миллион аҳолига эга улкан бозор ҳамда жуғрофий омилларни ҳисобга олган ҳолда, биргаликда мамлакатларимиз товарларини Африка ва Европа бозорларига чиқариш бўйича дастур ишлаб чиқишни таклиф этиши мумкин».