Ўзбекистон Республикаси Ер ресурслари, геодезия, картография ва давлат кадастри давлат қўмитаси раиси Абдушукур Абдуллаевнинг виртуал қабулхонасида илк бор фуқароларнинг видеомурожаатларини қабул қилиш имконияти яратилди. Бу ҳақда «Дарё»га қўмита матбуот хизмати маълум қилди.
Қўмита раисига ер, кадастр ва соҳага бошқа тааллуқли масалалар билан:
Ёзма равишда, виртуал қабулхона орқали;1097 қисқа рақами орқали хабар қолдириш;Қўмитанинг Facebook’даги саҳифасига ёзиш;Видеоконференс алоқа орқали шахсан мурожаат этиш мумкин.
Виртуал қабулхонада фуқароларнинг шикоят ва саволларини қабул қилиш куну тун амалга оширилади. 1097 рақамли «Ишонч телефони» ҳам шундай тартибда ишлайди.
Қайд этиш жоизки, бу реал вақт тартибидаги видеотрансляциялар имкониятига эга бўлган биринчи мультиканал виртуал қабулхона ҳисобланади. Ҳар ҳафта шанба куни соат 10:00 дан 12:00 гача фуқаролар қўмита раиси билан бунинг учун махсус ташкил этилган телекўприк орқали шахсан боғланиши мумкин. Телекўприк мамлакат миқёсида ўтказилади ва фуқаролар мурожаатлари натижалари ижтимоий тармоқлар ва қўмитанинг расмий сайтида тақдим этиб борилади.
Абдушукур Абдуллаевнинг синов тариқасидаги илк видеоқабули жорий йил 1 июлида ўтказилади.
Вилоятлардаги фуқаролар билан видеомулоқот қўмитанинг ҳудудий бўлимларида амалга оширилади. Бунга имкони бўлмаган фуқаролар видеомурожаатларни виртуал қабулхонага файл тариқасида юклаб жўнатиши мумкин.
Изоҳ (0)