Аввалроқ, Facebook ижтимоий тармоғи фойдаланувчиси Илҳам Сайманов Тошкент—Нукус рейси орқали учадиган самолётга чипта сотувчиларини танқид қилганди.
Ушбу ижтимоий тармоқнинг яна бир фойдаланувчиси Нариммат Йўлдашев Тошкент—Урганч темирйўл йўналиши учун чипта сотиб олишдаги сарсонгарчилиги ҳақида сўзлаб берди, деб хабар қилди «KRuz.uz». Нашр Нариммат Йўлдашевнинг фикрларини келтириб ўтди.
«Барчага маълумки йўловчи ташиш билан шуғулланиш арзон иш эмас, аммо мана шу монополист йўловчи ташиш билан шуғулланувчи ташкилотларда чипта сотиш билан шуғулланувчи кассирларни иш ҳақини сотган чиптасининг сони ва пул тушимига мутоносиб қилиб белгиланмас экан, чипта сотишдаги коррупция йўқ бўлмайди .
Мен аёлим билан Тошкентда даволанишга борган эдим, Даволаниш курси 10 кун. Шифоханадан чиқишимизга 5 кун қолганида Тошкент темир йўл вокзалида олдиндан чипта сотиш билан шуғулланувчи кассага бордим ва ички йўналиш бўйича чипта сотаётган 10-кассага навбатга турдим.
Навбатда туришим мобайнида ярим соатлардан кейин 11-кассанинг тушлик вақти тугаб ёшгина қизча кассага кириб келди . Мен ўзимнинг ва аёлимнинг шахсини тасдиқловчи ҳужжатларни кассир қизга узатиб, менга 24 ёки 25 июнга Урганчга кетадиган поезднинг купесидаги пастки ўриндиқлардан 2 та чипта беришини сўрадим. Кассир ҳужжатларга бир назар солиб «сиз қарақолпоғистонлик экансиз шунинг учун Урганчга чипта беролмайман. Қарақолпоғистонга борадиган поездларгагина чипта олишингиз мумкун», деди. Менга Урганч қулай, Урганч 21 км ,Тўрткўл 30 км ва Нукус 130 км, шунинг учун менга Урганчга чипта сотишини талаб қилсам, «энди сиз билан гаплашмайман, боринг бошқа кассаларга» деб ҳужжатларимни олдимга ташлади.
Кейин кассалар бўйича навбатчи смена бошлиғини қидирсам у йўқ экан, бироздан кейин кассирлар тарафидаги эшик очилиб, баланд бўйли ёш бўлишига қарамай тепа сочи тўкила бошлаган йирик гавдали темирйўлчилар формасини кийган йигит чиқиб келди . Унга «Кассалар бўйича смена бошлиғи ким?» дея берган саволимга «Мен» деб жавоб берди .
Мен унга вазиятни тушунтирдим. Ўзимнинг Чернобилчи 2-гуруҳ ногирон эканлигим ва аёлимнинг қандли диабет билан оғриши сабаб бизга купе вагонидаги пастки жойлардан 2 та чипта керак эканлиги ҳамда 11-кассадаги кассирнинг ҳаракатларидан норозилигимни айтдим.
Ўзини смена бошлиғи деб таништирган ходим «ўша қиз бекорларни айтибди, сизга билет сотишга мажбур, боринг смена бошлиғи айтди денг», деб ўзи кимлар учундир телефондан Россияга чипта топиб бериш ва бу чипталар қанчага тушиши ҳақида тушунтириш билан овора бўлиб кетди.
Мен олдин ярим соат навбат кутганим 11-кассага яна ярим соатдан кейин смена бошлиғи айтган гаплардан дадиллашиб келдим. Аммо 11-кассада ўтирган қизча ҳам анойилардан эмасга ўхшайди. Мен унга «Мени смена бошлиғи жўнатди. Менга Урганчга 2 та чипта купейни вагонга беринг» деган гапимга «ўша смена бошлиғининг ўзи берсин чиптани, мен сизга чипта сотмайман» деди .
Кейин мен ўша ердаги одамлардан темир йўл кассалари раҳбарлари ўтирадиган жойни аниқлаб, кассаларнинг кун чиқар тарафидаги иморатга кириб борсам, пастда 1-қаватда ўтирган навбатчи ходим соат 13:00 бўлганини ва барча ходимлар ва раҳбарлар тушликка чиқиб кетганлиги сабаб соат 14:00 да келишимни айтди.
Шу атрофда 1 соат айланиб юриб соат 14:00 лардан ўтиб яна бордим ўша идорага, навбатчи мени кўриши билан 4-қаватдаги Суръат деган одамга мурожаат қилишим мумкинлигини айтиб, ичкари киритиб юборди . Суръат деган йигитни 4-қаватдан топиб сўз бошлаган эдим муддаомни тушуниб, қачон ва қаерга чипта керак деб сўради. Мен 24 ёки 25 июнларга Урганчга 2 та купейни керак десам, «у кунларга иложи йўқ, лекин 26- июнга 2 та купени қилиб бериши мумкинлигини айтди» ва телефондан кимгадир қўнғироқ қилиб, менга 26 июнга 2 та купени чипта сотишни тайинлади ва менга 1-сонли брон кассасига боришимни тайинлади.
Мен пастга тушиб 1-кассада ўтирган аёлга «мен тўғримда ҳозир сизга қўнғироқ қилишди, менга Урганчга 2 та чипта купейни вагондан иложи борича пастги жойлардан», деб ҳужжатларимни узацам, у менга ҳужжатларимни қайтариб бериб «ҳеч қандай қўнғироқ бўлгани йўқ, Урганчга умуман чипта йўқ деди».
Мен яна Суръатни олдига чиқишга мажбур бўлдим. У Кассирга: «Мен сизга ҳозиргина қўнғироқ қилдим, нега одамларни овора қилаверасизлар», деб қаттиқроқ телефондан гапирганидан кейин, ҳалиги кассир аёлнинг «сиз айтган одам олдимга келмади, келса дарров бервораман», деган овози эштилди.
Шундан кейин Сурат «Боринг, ҳозир сизга билет беради», деганидан кейин яна пастга тушиб ўша 1-брон кассасига бориб 2 та чипта купени вагонга фақат бир жой пастдан, бир жой юқоридан берди, менинг иложи бўлса иккаласини ҳам пастки жойдан бўлсин деган илтимосимга, «ҳеч ҳам иложи йўқ» деб жавоб берди .
Ана энди кутилган 26 июнь соат 19:30 ларда Тошкент — Шовот поездига одамлар чиқа бошлади, 20:20 да поезд йўлга тушди.
Сизга ёлғон менга чин не кўз билан кўрайки биз чиққан 6-вагонга бор йўғи 10 тача одам чипта билан чиқди. Йўлда чиққанлар билан вагондаги 36 ўринда кўпи билан 18 та ўрин банд бўлди, қолган тенг ярми Урганчгача бўш келди.
Биз чиққан 1-купеда эр-хотин иккимиздан бошқа биронта ҳам одам Урганчгача чиқмади…
Юқорида бўлиб ўтганлардан келиб чиқиб, Ўзбекистон Темир Йўллари ҳиссадорлик компанияси таркибида ишловчи кассирлар, булар ўзлари ишлаётган компаниянинг ривожи учун ишлаяптими ёки кимлардир тарафидан ёлланган қўпорувчиларми (душманлар), негаки кейинги пайтда бирорта йирик компания ёки корхонани арзон гаровга сотиб олиш учун, олдин ўшани банкрот, яъни инқирозга учратиб кейин арзон гаровга сотиб олинади деган гап тез-тез ишлатилмоқда.
Президентимиз ва ҳукуматимиз халқ фаровонлигини таминлаш йўлида қанчадан-қанча ҳаракатлар қилаётган бир пайтда бу каби кўринишлар ва ҳаракатларни фақат душманларгина қилиши мумкин».
Изоҳ (0)