2 июнь куни Россиянинг Бакулев номидаги юрак-қон томир хирургияси маркази директори, академик Лео Бокерия Ўзбекистонга келди. Ўзбекистон Соғлиқни сақлаш вазирлиги (ССВ) Ахборот хизмати хабарига кўра, Россия ССВ бош кардиохирурги Лео Бокерия ташриф давомида Республика ихтисослаштирилган кардиология марказининг Хоразм филиали фаолияти билан танишади.
Лео Бокерия ўзбекистонлик мутахассислар билан ҳамкорликда Хоразм вилоятида юрак-қон томир касалликларининг оғир асоратли турлари билан оғриган беморларда жарроҳлик муолажаларини ўтказади — ушбу жараён Ўзбекистон кардиожарроҳлари учун ўзига хос мастер-класс вазифасини ҳам ўтайди. Россиялик академик Хоразм вилоятида 4 июнга қадар бўлади.
Эслатиб ўтамиз, Республика ихтисослаштирилган кардиология марказининг Хоразм филиалида Ўзбекистон Президенти кўрсатмасига асосан Россиянинг Бакулев номидаги юрак-қон томир жарроҳлиги илмий-амалий маркази филиали ташкил этилмоқда. Ҳозирда бу ерда йилига 100 дан ортиқ кардиохирургик амалиётлар ўтказилаётган бўлса, филиал минтақавий шифохона мақомини олгач, бу кўрсаткич 3—4 баробар ошиши кутилмоқда.
Шу вақтгача Республика ихтисослаштирилган кардиология марказининг Хоразм филиалида вазни 10 килограммдан кам бўлган чақалоқларда кардиожарроҳлик амалиёти ўтказилмаган. Илмий-амалий марказ филиали Хоразмда иш бошлаши хорижлик ҳамкасблар билан бирга шу ернинг ўзида бир ёшгача бўлган болаларда ҳам муракаб юрак жарроҳлигини амалга ошириш имкониятини беради.
Изоҳ (0)