Германияда мактаб ўқувчиси дарсдан олиб чиқилиб, Непалга депортация қилинди

Германиянинг Дуйсбург шаҳрида миграцион хизмат ходимлари гимназия ўқувчисини дарсдан олиб чиқиб, уни Непалга депортация қилди. Бу ҳақда Meduza хабар бермоқда.

14 ёшли Бивси Роанага синфдошлари билан хайрлашиш имконияти берилди, шундан сўнг у ота-онаси билан биргаликда Непалга учадиган самолётга чиқарилди.

Дарс пайтида Роанани директор хонасига чақиришди. У ерда миграцион хизмат ходимлари қизга вазиятни тушунтирди. Гувоҳларнинг айтишича, ўқувчи кўз ёшларини тия олмаган.

Роана икки дўсти билан хайрлашди, қолган ўқувчиларга воқеани шифокор ва роҳиб гапириб берди. Шундан сўнг қиз уйга олиб борилди, у ердан эса ота-онаси билан бирга миграцион хизмат ходимлари ҳамроҳлигида Франкфурт аэропортига етказилди. 30 май куни қиз оиласи билан Непалга учиб кетди.

Роананинг оиласи Германияга 1998 йили кўчиб келган эди. Қиз 18 ёшли акаси билан Германияда туғилган эди. Аммо уларнинг оиласига қочқин мақоми берилмаган эди. 2013 йили уларнинг мамлакатда яшаш ҳуқуқи тугади. Шу боис юридик нуқтаи назардан депортация қонуний равишда амалга оширилган.

2016 йили маъмурий суд оиланинг қочқинлик мақомини тақдим этиш тўғрисидаги даъвосини яна бир бор рад қилган эди.