Шайхонтоҳурда Gentra’га ўғриликка тушган жиноятчи қўлга олинди
31 март куни соат 14:00 ларда номаълум шахс Тошкент шаҳрининг Шайхонтохур тумани ҳудудида Gentra русумли автоуловнинг ойнасини синдириб, фуқаро Мадина Асқаровага тегишли ҳужжатларни ва 1700000 сўмлик шахсий мулкини ўғирлаган эди. Ушбу жиноятни содир этган шахс яқинда ушланди. Бу ҳақда Тошкент шаҳар ИИББ расмий сайти орқали маълум қилинди.
Мазкур ҳолат бўйича Шайхонтохур туман ИИБ ҳузуридаги Тергов бўлими томонидан ЖКнинг 169-моддаси 1-қисми ва 227 моддаси 2-қисми «а» банди (ўғрилик ҳамда муҳим шахсий ҳужжатларни эгаллаш ва нобуд қилиш) аломатлари билан жиноят иши қўзғатилган эди.
Тошкент шаҳар ИИББ ходимлари томонидан ўтказилган тезкор-қидирув тадбирлари натижасида мазкур жиноят Андрей Николаевич Гриченко томонидан содир этилганлиги аниқланди.
Гриченкога нисбатан қамоққа олиш тарзидаги эҳтиёт чораси қўлланилди.
Ҳозирда дастлабки тергов ҳаракатлари давом эттирилиб, унинг бошқа жиноятларга алоқадорлиги текширилмоқда.
