Пойтахт Тошкент пара-дзюдо бўйича Осиё ҳамда Океания минтақалари чемпионатига мезбонлик қилди. Бундай типдаги мусобақа илк бор ташкил этилди, деб маълумот берди Ўзбекистон паралимпия қўмитаси матбуот хизмати.

26 май куни очилиш маросими ўтказилган мусобақа 28 май куни ўз ниҳоясига етди. «Универсал» спорт саройида ўтган турнир 2020 йил Токиода бўлиб ўтадиган ёзги Паралимпиада ўйинларига рейтинг очколарини бериши билан ажралиб турарди. Шу боисдан унда қитъанинг пара-дзюда энг олди мамлакатлари иштирок этди: Эрон, Жанубий Корея, Ҳиндистон, Ироқ, Тожикистон, Хитой Тайпейи, Таиланд, Қозоғистон ва Ўзбекистон.

Ўзбекистон делегацияси мусобақани 9 та олтин, 2 та кумуш ва 7 та бронза медаллари билан умумжамоа хисобида 1-ўринда якунлашга муваффақ бўлди. 3 та олтин, 3 та кумуш ва 3 та бронза медали бор Жанубий Корея иккинчи, 2 та олтин, 2 та кумуш ва 3 та бронзага эга чиққан Эрон учинчи ўрин билан чекланди.