Австралия ҳукумати Афғонистонга қўшимча 30 нафар ҳарбий хизматчи юборишга қарор қилди. Бу ҳақда мамлакат мудофаа вазири Марис Пейн маълум қилди, дея хабар беради «ТАСС».
«Афғонистоннинг терроризмга қарши глобал курашдаги марказий ўрнини ҳисобга олиб, Австралиянинг қўллаб-қувватлаш миссиясига қўшиладиган улушни ошириши тўғри ва ўз вақтида қабул қилинган қарор ҳисобланади. Ҳарбийларнинг Афғонистонга жўнатилиши аниқ муддатлари яқин ҳафталар мобайнида эълон қилинади», — деди Марис Пейн.
Австралия Афғонистонга ҳарбий контингентини 2001 йилда жўнатган, 13 йил давомида унинг таркиби ўртача 1500 хизматчидан иборат бўлганди. Ўтган йиллар мобайнида мамлакатда 42 нафар австралиялик ҳалок бўлди, 260 нафардан ортиғи жароҳат олди.
2013 декабрида собиқ бош вазир Тони Аббот Урузгон вилоятидаги ҳарбий базанинг ёпилиши ва барча қисмларнинг уйга қайтишини маълум қилди. Ҳукумат ўшанда Афғонистонда йўриқчилар ва махсус бўлинмани қолдиришга қарор қилганди.
Ҳозирда мамлакатда, асосан Кобул атрофида 270 нафарга яқин австралиялик маслаҳатчи ва махсус бўлинма ҳарбийлари бўлиб турибди.
Изоҳ (0)