GTA: San Andreas ва бошқалар: Ўзбекистонга олиб кириш ва тарқатиш тавсия этилмайдиган компьютер ўйинлари рўйхати тасдиқланди

Ахборот ва оммавий коммуникациялар соҳасидаги Эксперт комиссиясининг 25 январдаги баённомаси билан Ўзбекистонга олиб кириш, тайёрлаш ва тарқатиш тавсия этилмайдиган компьютер ўйинлари рўйхати тасдиқланди. Бу ҳақда Ўзбекистон Интеллектуал мулк агентлиги хабар бермоқда.

Рўйхатдан жами 34 та компьютер ўйини ўрин олган бўлиб (.pdf), улар орасида GTA: San Andreas, Mass Effect, Assasin’s Creed: Brotherhood, Fallout: New Vegas, Dead Space, Call of Duty: Black Ops, Mortal Kombat X, The Sims 3, 4 кабиларни учратиш мумкин.

Хабар беришларича, ушбу қарор «лицензиат, ЭҲМ учун яратилган дастурларни такрорлаш, сотиш ва прокатга бериш фаолиятини амалга оширишда муаллифлик ҳуқуқи ва турдош ҳуқуқлар тўғрисидаги қонун ҳужжатларига мажбурий риоя қилинишини ҳамда зўравонликни, порнографияни, мамлакат хавфсизлиги ва ижтимоий-сиёсий барқарорликни, фуқаролар тинчлигини, миллатлараро ва динлараро тотувликни бузишни, Ўзбекистон тўғрисида нотўғри ахборотлар тарқатилишини ҳамда унинг тарихий, маданий ва маънавий бойликлари бузиб кўрсатилишини тарғиб қилувчи ЭҲМ учун яратилган дастурларни сотишга йўл қўймасликни таъминлаш» мақсадида қабул қилинган.

«Барча лицензиатлар номлари келтирилаётган компьютер ўйинларининг нусхаларини тайёрланишига, тарқатилишига ва прокатга берилишига йўл қўймасдан фаолият олиб боришлари талаб этилади», — дейилади агентлик ахборотида.