AlphaGo дастури 27 май куни го ўйини бўйича энг кучли ўйинчи — Кэ Цзени Хитойда ўтган мусобақанинг сўнгги — учинчи партиясида мағлуб этди. Meduza’нинг хабар беришича, дастлабки икки партия ҳам AlphaGo фойдасига ҳал бўлган эди.
«Синьхуа» агентлиги хабарига кўра, Цзе уч ярим соат давом этган қарама-қаршиликдан сўнг таслим бўлган.
«Мен совуқ, хотиржам ва даҳшатли рақибга дуч келдим. Мен AlphaGo’нинг фақат ярим ҳаракатларини олдиндан тўғри тахмин қила олдим, холос», — дея ўйинчининг сўзларидан иқтибос келтирмоқда агентлик.
Инсонни енгган дастурни ишлаб чиққан DeepMind компанияси дастурчиларининг маълум қилишича, бу AlphaGo’нинг сўнгги ўйини бўлган (мазкур компания Alphabet корпорациясига тегишли). The Verge’нинг ёзишича, компания го ўйинчилари ўрганиши учун дастур ўзи билан ўзи ўйнаган 50 ўйин ҳақидаги маълумотни чоп этади.
«AlphaGo катта эҳтимол билан [inson uchun] рақиб эмасди, унинг вазифаси — ўйинчиларни уч минг йиллик тарихга эга ўйинда янги стратегиялар ва янги ғояларни ўйлаб топишга илҳомлантириш эди», — деди DeepMind компаниясининг асосчиларидан бири Демис Хассабис.
«AlphaGo’ни ишлаб чиққан тадқиқотчилар жамоаси энди ўз куч-ғайратини бошқа катта вазифаларни ҳал қилишга, вақти келиб олимлар олдидаги энг мураккаб вазифалар — янги дори-дармонларни ишлаб чиқиш, энергия истеъмолини камайтириш ёки янги инқилобий материалларни ўйлаб топиш кабиларни ҳал қилишга ёрдам берадиган илғор умумий алгоритмларни ишлаб чиқишга йўналтиради», — дейилади DeepMind компанияси баёнотида.
AlphaGo — профессионал го ўйинчисини мағлуб этишга қодир илк компьютер дастуридир. Бунгача го ўйинида инсонни билан рақобатлаша оладиган сунъий идрокни ишлаб чиқиш учун бир неча ўн йиллар керак бўлади, деб тахмин қилинарди.
2016 йилнинг баҳорида дастур кўргазмали ўйин вақтида го гроссмейстери Ли Седолни мағлуб этган эди. Дастурга унинг сўнгги учта ўйинида рақиблик қилган 19 ёшли Кэ Цзе эса го ўйинчиларининг жаҳон рейтингида биринчи ўринда туради.
Изоҳ (0)