Бундай ёқимсиз муаммога кўпчилик дуч келади. Оёқдаги қадоқлар нафақат унчалик яхши кўринмайдиган, гўзаллик билан боғлиқ бўлган муаммо. Қадоқлар баъзан маълум бир ноқулайлик ва кучли оғриқ келтириб чиқаради. Улар ўз вақтида даволанмаса соғликка жиддий зарар етказиши мумкин. Қадоқлар қандай пайдо бўлади ва уларни қандай йўқотиш мумкин?
Қуруқ қадоқ нима?
Қуруқ қадоқ – бу ўлик ҳужайраларнинг бир жойга тўпланиб қолиши. У терининг маълум бир жойига узоқ вақт босим берилиши ёки ишқаланиши натижасида пайдо бўлади. Босимлар пайдо бўлишининг бир неча сабаблари мавжуд. Бу сабабларни эса икки гуруҳга ажратиш мумкин – ташқи ва ички.
Ташқи сабабларга қуйидагилар киради:
- жуда тор ёки ўлчами нотўғри танланган оёқ кийим;
- ноқулай ёки баланд пошнали оёқ кийим;
- бармоқларни сиқиб турадиган, учи ҳаддан ташқари тор бўлган оёқ кийим;
- тагчарми жуда юпқа оёқ кийим.
- оёқ кафтининг ўзгариши (кўпинча ясси оёқлик);
- умуртқа билан боғлиқ бўлган муаммолар;
- терининг ёшга доир ўзгаришлари;
- ўзига хос қадам ташлаш;
- ортиқча вазн;
- эндокрин касалликлар (шу жумладан, қандли диабет);
- организмда витаминлар ва микроэлементлар етишмаслиги;
- замбуруғли инфекция.
Қуруқ қадоқлар кўпинча:
- бармоқлар орасида;
- жимжилоқда;
- бош бармоқнинг ташқи томонида;
- бармоқларнинг остки қисмида пайдо бўлади.
Қуруқ қадоқларни махсус ва замонавий тиббиёт воситалари ёрдамида даволашнинг кўплаб усуллари мавжуд.
Замонавий фармацевтика саноати қуруқ қадоқларни даволаш ва уларнинг олдини олиш учун жуда кенг ассортиментда дори-дармонларни тақдим қилмоқда. Уларни дорихоналардан олиш мумкин. Бу дори-дармонларнинг асоси салицил ва сут кислотаси, натрий гидроокис, шунингдек қончўп (чистотел)дан иборат. Улар махсус пластирлар, настойка, томчи ёки гел кўринишида бўлиши мумкин. Жуда оғир ҳолатларда эса лазер ва суюқ азот ёрдамида махсус шифокорлик даволаш тадбирлари қўлланилади.
Қадоқни халқ табобати усуллари билан даволаш тарафдорлари ҳам бор. Лекин аҳволни ёмонлаштирмаслик ва салбий оқибатларга олиб келмаслик учун яхшиси бу соҳада тўғри даволаш усулини танлашга ёрдам берадиган тажрибали мутахассисдан маслаҳат олган маъқул.
Қадоқларни даволаш узоқ давом этадиган ва қийин жараён ҳисобланади. Шунинг учун қуруқ қадоқларни даволашдан кўра уларнинг олдини олган осонроқдир.
Қуруқ қадоқлар пайдо бўлишининг олдини олиш учун қуйидагиларга эътибор қаратиш лозим:
- қулай, тўғри танланган юмшоқ ва эгилувчан тагчармли оёқ кийим;
- оёқ кафтлари ўзгаришида ортопедик патаклар;
- оёқ кийим белгиланган мақсадига мос келиши зарур (масалан: кроссовка – спорт учун, кундалик кийиш учун – тумшуғи кенг оёқ кийим);
- кундалик пойабзал танлашда баланд пошналилардан воз кечинг (4 см гача);
- табиий матоли, чоксиз пайпоқчалар ёрдамида терини ҳимоя қилинг;
- қуруқ терига ёрдам берувчи озиқлантирувчи ва намлантирувчи воситалардан фойдаланинг;
Манба: «Lady.tochka.net»
Изоҳ (0)