Бугун пойтахт дербиси: «Бунёдкор» — «Пахтакор». Уни нима учун томоша қилиш керак? (видео)

Бугун —17 май куни футбол бўйича Ўзбекистон Олий лигасида 11-тур беллашувлари старт олади.

Турнинг биринчи кунида Ўзбекистоннинг амалдаги чемпиони «Локомотив» Қўқонга ташриф буюрса, Тошкентда «Бунёдкор» ва «Пахтакор» клублари ўзаро ҳисоб-китоб қилади.

Олий лига доирасида «қалдирғочлар» ва «шерлар» ўзаро 20 марта тўқнаш келган бўлиб, шуларнинг 8 тасида ғолибни аниқлаб бўлмаган. Етти учрашув «Бунёдкор»нинг, яна 5 таси «Пахтакор»нинг ғалабаси билан якунига етган. Тўплар нисбатига устунлик ҳам «Бунёдкор» томонида — 24:18.

Айни вақтда эса турнир жадвалида «пахтакорчилар»нинг аҳволи нисбатан яхшироқ. «Пахтакор» 14 очко билан 8-ўринни эгаллаб турган бўлса, ҳисобида 10 очкоси бор «Бунёдкор» 12-ўриндан жой олган.

Тошкент дербиси олдидан ҳар икки клубда ҳам раҳбарият алмашгани, учрашувга бўлган қизиқишни янада ошириб беради. Миржалол Қосимов ҳамда Жасур Абдураимов тўқнашуви жамоалар қайси поғонада бораётган бўлса ҳам кўпчиликда катта қизиқиш уйғотиши мумкин.

Учрашувга чиқарилган чипталар «Бунёдкор» стадиони кассаларида сотилмоқда. Уларни секторига қараб 15 ёки 30 минг сўмдан харид қилиш мумкин. Ўйин 19:00 да старт олади.

Пойтахт дербисини нима учун томоша қилиш керак деган саволга жавобни қуйидаги видеолавҳадан олиш мумкин.

Ўзбекистон Олий лигаси 11-тур ўйини 17 май, чоршанба

«Бунёдкор» — «Пахтакор» — 19:00

Ўзаро ўйинлар: 20«Бунёдкор» ғалабаси: 7«Пахтакор» ғалабаси: 5Дуранглар: 8«Бунёдкор» голлари: 24«Пахтакор» голлари: 18