«Худога қаттиқ ишонаман». Хонанда Тамила «Фотошопда қилинган беҳаё суратлар»ини собиқ турмуш ўртоғи тарқатганини маълум қилди

Ижодий фаолияти бир муддат тўхтаб қолган хонанда Тамила «Shok.uz» лойиҳасига берган интервьюсида у иштирок этган беҳаё суратлар ва видеоларни ким тарқатганини айтиб ўтди. Бу ҳақда «Darakchi.uz» хабар бермоқда.

Хонанданинг сўзларига кўра, собиқ турмуш ўртоғи унинг ижодий фаолиятига доим қарши бўлган. Жумладан, улар ажрашганидан кейин ҳам у Тамилага тинчлик бермаган.

Ижодда танаффус қилишимга шахсий ҳаётим сабаб. Ижод қилишимга турмуш ўртоғим қарши эди. У билан анча олдин ажрашганмиз, лекин мени ҳалигача тинч қўймайди. У мен ижод билан шуғулланмаслигим учун қўлидан келган ҳамма ишни қилди. Жумладан, туҳмат ва менинг иштирокимда Фотошопда қилинган беҳаё суратлар ва видеони ҳам тарқатди.

Мен бўлиб ўтган ишлардан ғазабга тушдим. Уларни суд тиббий экспертизасига топширдим ва бу суратлар ҳамда видеода мен эмаслигимни исботладим. Суд ходимлари менга туҳмат қилган инсонни судга беришим мумкинлигини айтишди. Лекин мен бундай қилмадим. У менинг ҳаётимни барбод қилган бўлса ҳам, мен унинг ҳаётини бузишни истамадим. Сабаби, мен Худога қаттиқ ишонаман.

У инсон ҳозиргача мени тинч қўймайди. Ўтган йиллар ичида қандай дўзаҳда яшаганимни сиз тасаввур ҳам қилолмайсиз. Агар у мени тинч қўймайдиган бўлса, давлатдан ёрдам сўрашимга тўғри келади. Мен шунчаки тинч яшашни истайман.

Тамила, хонанда