Жорий йилнинг тўрт ойи давомида Ўзбекистон Республикаси прокуратураси солиқ ва валютага оид жиноятларга қарши курашиш департаментининг Тошкент шаҳар бошқармаси ва ҳудудий бўлимлари томонидан жами 177 та валютага оид қонунбузарлик ҳолати аниқланган. Ушбу ҳолатлардан 31 тасига нисбатан жиноят иши қўзғатилган, 146 та ҳолат юзасидан маъмурий ҳуқуқбузарлик бўйича тегишли тартибда ҳужжатлар тўпланиб, судга юборилган. Бу ҳақда Тошкент шаҳар ИИББда 11 май, пайшанба куни бўлиб ўтган брифингда Тошкент шаҳар прокурорининг ўринбосари Фатҳулла Абдураҳимов маълум қилди.
Ҳолатлар юзасидан жами 364 570 АҚШ доллари, 11 746 евро, 663 400 Россия рубли, 227 188 Қозоғистон тенгеси, 1,299 млрд сўм ва 332 млн сўмлик бошқа турдаги валюта маблағлари ашёвий далил сифатида олинган.
Жумладан, департаментнинг Яшнобод тумани бўлими ходимлари томонидан фуқаро А.нинг аризасига асосан Шайхонтоҳур туманида жойлашган «Флешка» савдо марказида тезкор тадбир ўтказилган. Доимий равишда валюта олди-сотдиси билан ноқонуний шуғулланган Рустам ва Нодир исмли шахслар ўзаро жиноий тил бириктириб, фуқаро А.га ҳар бир АҚШ долларини «қора бозор» курсида 7700 сўмдан баҳолаб, 5200 АҚШ долларини қонунга хилоф равишда 40 млн сўмга сотаётган вақтда департамент ходимлари томонидан қўлга олинган.
Шунингдек, воқеа жойида улардан жами 16 минг АҚШ доллари, 10220 евро, 1010 Англия фунт стерлинги, 440800 Россия рубли ашёвий далил сифатида олинган. Мазкур ҳолат бўйича Жиноят Кодексининг 177-моддаси иккинчи қисми билан жиноят иши қўзғатилиб, ҳозирда тергов ҳаракатлари олиб борилмоқда.
Изоҳ (0)