Хитойда йўл четида жойлашган уйга бир йилда 48 марта машина урилди

Хитойнинг Хэйлунцзян провинциясида қад кўтарган бир қаватли уйга 2016 йили 48 марта машина келиб урилди. Бу ҳақда Meduza хабар бермоқда.

Бино Т-симон чорраҳада жойлашгани боис кўпгина ҳайдовчилар бурилиш чоғида бошқарувни қўлдан чиқариб, бинога урилиши кузатилди.

Уй эгаси Хэ Хайцзюнь деворга «Тезликни туширинг!» деб ёзилган катта лавҳа ҳам осиб қўйди, аммо, айтилишича, машиналар унга урилишда давом этмоқда.

Уй эгасининг давом этишича, бир неча йил муқаддам уй олдида янги йўл ётқизилганидан сўнг ЙТҲлар юз бера бошлаган. Ҳайдовчилар 90 даража остида чапга бурилиш чоғида унга урилиб кетади.

Хайцзюнь ва унинг рафиқаси Сюй Жэньсян олиб борган ҳисоб-китобларга қараганда, шу пайтга қадар уйга 100 марта машина урилган. Шунингдек, улар ЙТҲлар акс этган фотосуратларни тўплаб, уларни туман маъмуриятига йўлланувчи петиция ва мурожаатларга илова қилиб боради.

Аммо амалдорлар шикоятларга жавоб бермагани боис Хайцзюнь девор олдида эски ғиштлардан тўсиқ кўтарди. Эркак машиналар уйгача етиб келмай, тўсиқда қолиб кетишидан умид қилмоқда.