Уруш содир бўлса, Латвияни 17,5 минг ҳарбий ҳимоя қилади

Латвия Мудофаа вазирлигининг маълум қилишича, уруш юзага келса, республика ҳарбий тайёргарликка эга 17,5 минг нафар ходимга суяниши мумкин. Бу ҳақда «ТАСС» хабар бермоқда.

Латвиянинг мудофаа концепциясига мувофиқ республиканинг Миллий қуролли кучлари ҳарбий тайёргарликка эга 17,5 минг ходим, шу жумладан, профессионал хизматда бўлиб турган 6,5 минг ҳарбий ходим, 8000 нафар халқ кўнгиллилари ва 3000 нафар захирадаги ҳарбий ходимдан иборат.

Бундан ташқари, Миллий қуролли кучларда ҳам Латвия, ҳам хорижда истиқомат қилувчи 7655 нафар ҳарбий ҳам бор.

Латвия келаси йил захирадаги 3000 нафар ҳарбийни Миллий қуролли кучларнинг маълум бир бўлинмасига бириктириш ва уларни ўқитиш вазифасини белгилаб олди.

Эслатиб ўтамиз, аввалроқ Рига портига Канада қуролли кучларининг техникаси ва анжомлари етиб келгани хабар қилинган эди.