Россия Сурияда тўртта хавфсизлик ҳудуди ташкил этишни таклиф қилмоқда. Бу ҳақда «Коммерсантъ» хабар берди.
Россия президенти Владимир Путин бу ҳақда Туркия президенти Ражаб Тоййиб Эрдўғон билан музокаралар давомида маълум қилган. У олдинроқ АҚШ президенти Дональд Трамп билан телефон орқали мулоқотда мазкур ташаббусни муҳокама қилган эди.
Путинга кўра, мазкур ҳудудларнинг пайдо бўлиши Сурияда қон тўкилишига барҳам беради ва сиёсий мулоқот тикланишига олиб келади. Уларни тузиш ҳақидаги меморандум Остона музокараларининг янги раунди давомида имзоланиши мумкин.
Хавфсизлик ҳудудларини Идлиб вилоятида, Хомсдан шимолда, шарқий Гута ва Сурия жанубида ташкил этиш таклиф этилмоқда. Уларнинг ичкарисида қурол ишлатиш тақиқланади, гуманитар ташкилотлар фаолияти учун барча шароитлар яратилади, ижтимоий инфрастурктурани тиклаш бўйича чоралар кўрилади.
Хавфсизлик ҳудудларининг ташкил этилиши расмий идоралар ишини тиклаш ва қочоқлар қайтиши учун шароит яратиш имконини беради. Уларда хорижий ҳарбий контингентлар жойлаштирилиши мумкин.
Изоҳ (0)