Фото: Кенгуруни ютиб юборган бўғма илон тимсоҳга ўхшаб қолди

Австралиянинг Квинсленд штатида истиқомат қилувчи аёл уйининг олдида тимсоҳни эслатувчи 5 метрли аметист бўғма илонни аниқлади, деб ёзади National Geographic.

Судралиб юрувчи бир нима тановул қилганини тахмин қилиш қийин бўлмади: унинг танаси ишган ва четдан қараганда тимсоҳга ўхшаб қолганди.

Воқеа жойига Cairns Snake Removals компаниясининг мутахассиси чақиртирилди ва у топилмадан ҳайратга тушди. Тажрибасига қарамай, мутахассис бундан катта илонни аввал кўрмаган эди.

У бўғма илонни машина юкхонасига жойлаш учун шеригини чақиртиришга мажбур бўлди. Илон овловчиси топилмадан шу даражада ҳайратда эдики, ўз хизмати учун пул олмади.

Одатда бўғма илонлар кемирувчи, қушлар, катта бўлмаган кенгуру ва шу катталикдаги жониворларни овлайди. Осон ўлжа топиш учун бу турдаги судралиб юрувчилар одамлар яшайдиган жойларга бориб, товуқ, мушук, тўтиқуш ва итларни овлайди.

Мутахассислар бу сафар бўғма илон тушликка кенгуру-валлабини «тановул» қилганини тахмин қилди. Йиртқич ва унинг ўлжаси жами 40 килограмм чиқди.

Аметист бўғма илон – Австралиядаги энг йирик илон ҳисобланади. Унинг узунлиги ўртача 3,5 метрни ташкил этади, баъзида 8 метрлилари ҳам учрайди.

Аметист бўғма илонлари Австралияда қўриқланадиган тури бўлиб, уларни ўлдириш қатъиян ман этилган. Шунинг учун илон овловчиси уни уйлардан йироққа жойлаштирди. Айни вақтда у шошилмай ўз ўлжасини ҳазм қилмоқда. Шундан кейин илон бир неча ҳафта ва ҳатто ойлаб тўқ юради.