Тошкентда 3—7 май кунлари «Шум бола» кинофестивали бўлиб ўтади

Ўзбекистондаги Гёте институти ва «Ўзбеккино» миллий агентлиги Германиянинг «Шлингел» халқаро кинофестивали билан ҳамкорликда 3—7 май кунлари навбатдаги «Шум бола» кинофестивалини ўтказади. Бу ҳақда «Дарё»га тадбир мутасаддилари маълум қилди.

Ёш томошабинлар — мактаб, лицей ва коллеж ўқувчилари ҳамда уларнинг ота-оналари Тошкент шаҳридаги Алишер Навоий номли кино саройига таклиф этилади. Улар учун 21-халқаро «Шлингел» кинофестивали доирасида тақдим қилинган янги немис фильмлари намойиш этилади.

Шунингдек, ўзбек киноижодкорларининг «Ойқиз эртаги» фильми ва янги анимацияли фильмлар билан танишиш имконияти мавжуд.

«Шлингел» кинофестивали директори Михаил Харбауер, продюсер Александра Прохазка, режиссёрлар Ален Гспонер ва Тони Лойзер «Шум бола» меҳмони бўлади.

Барча фильмлар рус тилига ўгирилган, кириш бепул.

«Дарё»нинг Telegram’даги расмий канали — @toshqindaryo’га аъзо бўлинг!