АҚШда полициядан 40 йил яширинган қотил қўлга олинди

АҚШнинг Миссисипи штатида полиция 1976 йилда амалга оширилган қотилликда гумонланиб қидирилаётган 61 ёшли Дэвид Ли Эддсни қўлга олди. Бу ҳақда, Daily Mail нашрига таяниб, «Вести.ru» хабар берди.

Эркак 1976 йилнинг май ойида Техасда ўз танишини пичоқлаб қўйганликда айбланган. Ўша вақтда жиноятни иссиқ изидан фош этишга муваффақ бўлинмаган. Иш 2014 йилда қайта очилган. Бунга полициячилар томонидан ўтказилган қотиллик жойида топилган ДНК таҳлили сабаб бўлган. Таҳлил натижасида Эддснинг жиноят содир этилган жойнинг яқинида яшаганлиги аниқланган.

2017 йилнинг бошида Эддс сўроққа чақирилган. Сўроқ давомида у қотилликка алоқадорлигини бутунлай рад этган, бироқ нима учун унинг ДНКси қотиллик жойидан топилганини тушунтириб бера олмаган. Бир неча кун олдин унга нисбатан расман айблов илгари сурилган, шундан сўнг жиноятчи яширинган.

Полициячиларда дарҳол Эддс Миссисипидаги ўрмонда яшириниши мумкин деган шубҳа уйғонган, чунки у бу жойларни яхши билган ва тез-тез бу ерда ов қилган.

24 апрелда ўтказилган операцияда Эддс қалин ўрмон ичидаги ўзи яшаган чодир ёнида қўлга олинган. У қўлга олинаётган вақтда қаршилик кўрсатмаган.

Яқин вақт ичида жиноятчи Техас штатига экстрадиция қилиниши керак. Уни қирқ йил аввалги иш бўйича суд кутмоқда.

«Дарё»нинг Telegram’даги расмий канали — @toshqindaryo’га аъзо бўлинг!