Навоий номидаги ДАКТда россиялик машҳур балерина Диана Вишнёва чиқиш қилди

Санкт-Петербургнинг Мариинский театри бош балеринаси, Россия халқ артисти Диана Вишнёва балет санъати мухлисларини Алишер Навоий номидаги Ўзбекистон Давлат академик катта театрига чорлади. Бу ҳақда ЎзА хабар бермоқда.

«Халқаро танловлар лауреатининг нафосат ва қалб уйғунлигидаги бетакрор рақслари кўплаб томошабинларни мафтун этган, санъати юқори баҳоланган. Диана Вишнёва жозибадор рақслари билан яна бир бор томошабинларга унутилмас дамларни ҳадя этди», — дейилади ЎзА ахборотида.

Кечада Жорж Бизе ва Родион Шчедриннинг бир актли «Кармен-сюита» балети, Мариинский театри балет труппаси яккахонларининг «Дон-Кихот», «Оққуш кўли», «Анна Каренина», «Шаҳризода» спектакллари ва бошқа балетлардан саҳна кўринишлари ҳамда хореографик дастурлари намойиш этилди.

«Дарё»нинг Telegram’даги расмий канали — @toshqindaryo’га аъзо бўлинг!