«Ижтимоий фикр»: Ўзбекистон аҳолиси яхши маошли иш топиш қулайлашди, электр ва газ билан таъминлаш юқори даражага кўтарилди, деб ҳисоблайди

«Ижтимоий фикр» жамоатчилик фикрини ўрганиш маркази аҳолининг Ўзбекистонни янада ривожлантириш бўйича Ҳаракатлар стратегияси мазмун-моҳиятидан хабардорлиги даражасини аниқлашга қаратилган сўровнома ўтказди, дея хабар бермоқда ЎзА.

79,9 фоиз респондентлар Ўзбекистон Президентининг 7 февралдаги «Ўзбекистон Республикасини янада ривожлантириш бўйича Ҳаракатлар стратегияси тўғрисида»ги фармони мазмун-моҳиятини яхши билишини таъкидлаган.

«Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини ўз вақтида қабул қилинган ҳужжат, деб ҳисоблайсизми?», деган саволга иштирокчиларнинг аксарияти (83,5 фоиз) ижобий жавоб берган.

«Сизни ўйлантираётган муаммолар Ҳаракатлар стратегиясининг қайси устувор йўналишларида ўз аксини топган?», деган саволга респондентларнинг кўпчилиги Стратегиядаги барча йўналишлар давлат ва жамият ҳаётида янги ривожланиш босқичини бошлаб беради, ўзларини қийнаётган муаммоларни самарали ҳал этишда муҳим аҳамият касб этади, деб ҳисоблайди.

«Сўровномада иштирок этганлар яхши маошли иш топиш, ойлик маошни вақтида олиш, тадбиркорлик фаолияти билан шуғулланишда қатор қулайликлар яратилганини, пенсионерлар, ногиронлар, Иккинчи жаҳон уруши қатнашчиларини ижтимоий ҳимоя қилиш, аҳолини электр энергияси ва табиий газ билан таъминлаш хизматлари юқори даражага кўтарилганини маълум қилган», — дейилади ЎзА ахборотида.

«Дарё»нинг Telegram’даги расмий канали — @toshqindaryo’га аъзо бўлинг!