Тошкент шаҳар ИИББ ички ишлар идораларининг хизмат кийимида йирик фирибгарлик жиноятларини содир этган шахснинг қўлга олинганлигини маълум қилди. Бу ҳақда 6 апрель, пайшанба куни бўлиб ўтган брифингда ахборот берилди.
2017 йил 9 мартдан 14 мартгача ички ишлар идоралари хизмати кийимида ўзини Ўзбекистон Ички ишлар вазирлиги ходими, бўлим бошлиғи подполковник Даврон Хўжаев деб таништирган фуқаро ўзи вақтинча ижарада яшаб турган хонадонни гўёки отасига тегишлилигини айтиб, уни Яшнобод туманида яшовчи аёлга сотмоқчи бўлган. Фуқаро фирибгарлик йўли билан яшнободлик аёлдан жами 12 миллион сўмдан зиёд пул маблағини олган.
Ҳолат юзасидан Жиноят Кодексининг 168-моддаси биринчи қисми — фирибгарлик йўли билан ўзгалар мулкини қўлга киритиш айблови асосида жиноят иши қўзғатилган.
Олиб борилган тергов-тезкор ҳаракатлари давомида ушбу жиноятни аслида 1992 йилда туғилган вақтинча ишсиз, ички ишлар идораларида ишламайдиган, фирибгарлик жинояти учун муқаддам уч марта судланган, фирибгарлик жиноятини содир этганлиги учун Самарқанд вилояти ИИБ томонидан қидирувда бўлган Жавоҳир Алиқулов содир этганлиги аниқланиб, у қўлга олинган.
Ундан далилий ашё сифатида ички ишлар идоралари хизмат кийими ва қалбакилаштирилган хизмат гувоҳномаси олинган. Бундан ташқари гумонланувчи Алиқулов худди шу усулда бир нечта фирибгарлик жиноятини содир этгани аниқланган.
Жумладан, 2016 йилнинг март ва 2017 йилнинг март ойларида Тошкент шаҳрининг Яккасарой туманида яшовчи фуқаронинг 73 миллион сўмдан ортиқ, 2017 йил 29 январда бошқа бир фуқаронинг 2 840 000 сўмлик ва 2017 йилнинг 30 январь куни яна бир фуқаронинг 22 миллион сўмлик пул маблағларини фирибгарлик йўли билан қўлга киритган.
Алиқуловнинг берган кўрсатмаларига кўра, у Самарқанд шаҳрида бир фуқародан ҳисобида беш миллион сўмдан ортиқ маблағ бўлган пластик картасини олган ва пул маблағларини ишлатиб қўйиб, уни эгасига қайтара олмаган.
Шундан сўнг, у ўзининг «Одноклассники» ижтимоий тармоғида танишган Тошкент шаҳрида яшовчи Нилуфар исмли танишига телефон қилган ва унинг уйига келган. Қизга ўзини банкир деб таништирган Алиқулов қизнинг уйида икки кун яшаган.
Фуқаро ўзининг Самарқанд вилояти ИИБ томонидан ўзи олган пластик карта иши бўйича қидирилаётганидан хабардор бўлган. У «Одноклассники»да орттирган дугонасига оғир вазиятда экани, қарзи борлигини баҳона қилиб, ундан 300 АҚШ доллари олган.
Кейин эса бошқа уйга ижарада яшаш учун чиққан ва шу уйни Яшнобод туманида яшовчи фуқаро Зулфия Қурбоновага сотмоқчи бўлган.
Алиқуловнинг сўзларига кўра, у ички ишлар идоралари хизмат кийимида юрса, унга ҳеч ким тегмайди, деб ўйлаган. Маълум бўлишича, у одамларни ўқишга ва ишга киритиш баҳонаси билан алдаб, пул олган.
Ҳозирги вақтда Алиқуловга нисбатан қамоқ эҳтиёт чораси қўлланилган ва тергов ҳаракатлари олиб борилмоқда.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)