Кипрдаги Британия базасида миллионга яқин қуш ўлдирилган

Кипрдаги Британия ҳарбий базаси ўз ҳудудида катта миқдордаги сайроқи қушларнинг йўқ қилинишига тўсқинлик қила олмасликда айбланди. Бу ҳақда «Корреспондент.net» хабар бермоқда.

Олимларнинг сўнгги ҳисоботига кўра, 2016 йилда Кипрда 1,7 миллионга яқин қуш ўлдирилган. 100 квадрат километрга яқин майдонни эгаллаган Британия ҳарбий базасида 800 мингга яқин парранда ўлдирилган.

Британия қушларни ҳимоя қилиш қироллик жамияти ва Birdlife Cyprus ташкилоти маълумотларига қараганда, Африка, Европа ва Осиёдан учиб келувчи қушларнинг деярли ярми Кипрда жойлашган Пила бурни орқали кўчади.

Айнан шу ерда браконьерлар энг кўп қуш овлайди. Кейин улар қора бозорда бир евродан сотилади ва тансиқ таомлар тайёрлаш учун фойдаланилади. Браконьерлар акация буталари орасига юпқа, деярли кўринмайдиган тўр тортиб чиқиши ва битта шундай тўрга 400 га яқин қуш тушиши мумкинлиги маълум қилинмоқда.

Британиялик ҳарбий олимлар ўз базаси ҳудудини акация буталаридан тозаламаётгани учун айбланмоқда. «Дарё»нинг Telegram’даги расмий канали — @toshqindaryo’га аъзо бўлинг!