Ўзбекистон тез орада ер усти аналог телеузатиш тармоғидан воз кечади. Бу ҳақда Ахборот технологиялари ва коммуникацияларини ривожлантириш вазирлиги бўлим бошлиғи Сирожиддин Усмонов маълум қилди, деб ёзади UzDaily.
Унинг маълумотларига кўра, Вазирлар Маҳкамасининг «Ўзбекистон Республикасида ер усти аналог телеузатиш тармоғини ўчиришни ташкил қилиш тўғрисида»ги қарори лойиҳаси тайёрлаб қўйилган.
Сирожиддин Усмонов таъкидлашича, аналог телеузатишлар графикка мувофиқ ўчирилади, муддатларнинг барчаси қарорда белгиланади. Кўрсатилган муддат тугагунга қадар аналог телевидение рақамли телевидение билан биргаликда фаолият олиб боради.
«Нима бўлганда ҳам ушбу жараён безарар кечади. Масалан, ҳужжатда кам таъминланган оилаларга имтиёзли кредит ҳисобидан рақамли приставкалар олиб бериш кўзда тутилган», — деди у.
Ҳужжатга кўра, 2017 йил охиригача йирик шаҳарларда ва туман марказларида 66 та кучли рақамли телеузаткичлар ҳамда олис аҳоли пунктларига кичик қувватли 328 та узаткичлар ўрнатилади.
Изоҳ (0)