Европа Иттифоқи суди иш жойида ҳижобда юриш тақиқини қонуний деб топди
Люксембургдаги Европа суди иш берувчиларга ўзларининг муслима ишчиларига иш вақтида ҳижобда юришни тақиқлашларига рухсат берди, дея хабар беради Meduza.
Европа Иттифоқи олий судининг бундай қарор қабул қилишига Франция ҳамда Бельгия фуқароси бўлган икки аёлнинг даъвоси сабаб бўлди. Улар иш жойида ҳижобсиз юришдан бош тортганликлари учун ишдан бўшатилган эди.
Бельгиялик муслима ўз ҳамкасбларига ҳар қандай диний ёки сиёсий белгилар туширилган либосларда юришни тақиқловчи G4S Secure Solutions қўриқлаш компаниясида ишлаган.
Франциялик аёл эса мижозлардан бири унинг ҳижобда ишлагани учун устидан шикоят қилганлиги сабаб технологик компаниядаги иш жойидан маҳрум бўлган.
Европа суди даъвони кўриб чиқиб, иш берувчилар ҳамкасбларига «кўзга ташланувчи диний, фалсафий ёки сиёсий белгилар туширилган» кийимларда юришни тақиқлашлари Европа Иттифоқи қонунларига зид эмас, деган қарорга келди. Бундай тақиқ «тўғридан-тўғри таҳқирлаш»га кирмайди, дея ҳисобланмоқда.
2016 йилнинг ёзида Франциянинг бир нечта курорт шаҳарлари пляжларда муслималар учун махсус чўмилиш кийими — бурқинида юришни тақиқлаган эди. Бундай қарорга Ниццадаги терактлардан сўнг келинган. Август охирида Франция олий судлов муассасаси — Давлат кенгаши мазкур тақиқни тўхтатиб қўйган эди.
«Дарё»нинг Telegram’даги расмий канали — @toshqindaryo’га аъзо бўлинг!
