Қирғизистоннинг «Дордой» клуби шарафини ҳимоя қилаётган ўзбекистонлик Алишер Азизов учинчи расмий ўйиндаги учинчи голини урди.

ОФК кубогининг гуруҳ босқичи сари ҳаракат қилаётган «Дордой» ўз майдонида Тожикистоннинг «Ҳосилот» клубини қабул қилди ва минимал ҳисобда зафар қучди. Учрашувдаги ягона голга ўзбекистонлик футболчи муаллифлик қилди.

«Дордой» аввалги босқичда Туркманистоннинг «Болқон» клуби билан тўқнаш келиб, Ўшда 1:1 ҳисобида дуранг ўйнаган, Болқонободда эса 2:1 ҳисобида зафар қучганди. Алишер Азизов ҳар икки ўйинда ҳам 1 тадан гол уришга муваффақ бўлган.

Қирғизистон клуби Тожикистондаги жавоб ўйинини 28 февраль куни ўтказади. Ундаги муваффақиятли натижа «Дордой»ни ОФК кубогининг гуруҳ босқичига олиб чиқади. Қайд этиш керак, ОФК кубоги қитъанинг Осиё Чемпионлар лигасидан кейинги ўринда турувчи клублар мусобақаси ҳисобланади.

ОФК кубоги Плей-офф 21 февраль, сешанба

«Дордой» (Қирғизистон) — «Ҳосилот» (Тожикистон) 1:0

Гол: Алишер Азизов, 54 (1:0).

«Ҳосилот»га қарши учрашувдан кейин Алишер Азизов «Championat.asia» нашрига интервью бериб, мамлакатда ўзбекистонлик футболчиларга бўлаётган қизиқиш унинг туфайли ортиб бораётганига аниқлик киритган. Аввалроқ ҳужумчи Қирғизистондаги фаолияти орқали Ўзбекистон миллий терма жамоасидан чақирув олишга умидвор эканига шама қилиб ўтганди.

Бу ерда менга катта ишонч билдиришмоқда. Агар бошқа мамлакат клубида Ўзбекистон номидан тўп тепсангиз, Ўзбекистон зўр экан дейишади. Ишончни оқлай олмасангиз, футболчининг савияси паст экан дейишади.

Ҳозир Қирғизистондаги барча клублар ўзбекистонлик футболчиларга қизиқиб қолган. Терма сафида ўйнамаган футболчи шунчалик савияли бўлса, демак Ўзбекистондаги футболчилар зўр эканда, дейишади. Бу тарафдан Ўзбекистон футболининг обрўси ошмоқда.

Алишер Азизов, «Дордой» аъзоси

Футболчининг Қирғизистондаги фаолиятига қадар қирғизистонликлар ўзбекистонлик футболчиларни зўр деб ўйлаганми ёки йўқ — аниқлик киритилмаган.