Нью-Йоркнинг Жон Кеннеди номидаги халқаро аэропортида хавфсизлик хизмати ходимларининг масъулиятсизлиги туфайли, 11 киши текширувдан ўтмасдан, самолётга чиқиб олишга муваффақ бўлди, деб ёзади «ТАСС» New York Post газетасига таяниб.

Нашр маълумотларига кўра, ҳодиса аэропортнинг бешинчи терминалида юз берган, аэропорт соқчилари ўз жойида бўлмаган. «Йўловчилар бундан бехабар бўлган ва металл детекторидан ўтишни бошлаган», — дея нашр ўз манбаси сўзларини келтирди. Шу билан бирга таъкидланишича, 11 йўловчининг шахсий буюмлари кўздан кечирилган.

Полиция ҳодиса ҳақида икки соатдан сўнг хабар топди, аммо улар йўловчилар қаерга йўл олганини аниқлай олмади.

Ҳукумат ҳодиса юзасидан текширув олиб бормоқда, аммо қоида бузилиши хавфсизлик учун таҳдидли эмаслиги айтилмоқда.