Филиппин пойтахти Манилада бир неча минг киши суд ҳукмисиз қотилликлар ва ҳукуматнинг мамлакатда ўлим жазосини тиклаш режасига қарши норозилик билдириб, кўчаларга чиқди. Бу ҳақда «РИА Новости» хабар бермоқда.
Норозилик намойиши «Ҳаётни қутқариш учун пиёда марш» номини олди ва Филиппин католик епископлари конференцияси томонидан қўллаб-қувватланди.
Акциялар черков гиёҳванд кишилар ва наркотик тарқатувчиларга қарши кураш олиб бораётган президент Родриго Дутертенинг ҳаракатларини танқид қилганидан бир неча кун ўтиб бошланди.
БМТ маълумотларига кўра, Дутерте Филиппин президенти лавозимини эгаллаган 2016 йил 30 июндан бери мамлакатда наркосавдо билан боғлиқ 6 мингдан ортиқ киши ўлдирилди.
Изоҳ (0)