Чемпионлар лигасининг амалдаги чемпиони ҳисобланган Мадриднинг «Реал» клуби Европа тахти учун навбатдаги курашни давом эттирмоқда. Нимчорак финалда «Наполи»ни 3:1 ҳисобида таслим қилган «Қироллик клуби» навбатдаги босқич учун биринчи қадамни ташлади.

Дунёнинг энг кучли клуби билан ўйнадик. Шу қадар кўп хато қилганимиздан афсусдаман. Уй учрашувида 2:0 ҳисобида зафар қучишга ҳаракат қиламиз ва биламизки, бу борада «Реал»нинг фикри умуман бошқача.

Энг яхши ўйинимизни намойиш қилиб, рақиб билан тенгма-тенг футбол кўрсатсак бўларди, бироқ максимумимизни намойиш эта олмадик.

Бундай типдаги жамоага қарши ўйнаш катта мактаб. Ёш футболчиларнинг ўсиши учун бу жуда зарур. Сўнгги уч ой давомида «Реал»ни кузатишга ҳаракат қилдим, улар ажойиб формага кириб олганди.

Маурицио Сарри, «Наполи» бош мураббийи

«Наполи» президенти янги харид қилинган футболчиларга кам имконият берилаётгани ҳақида гапирди.

Беш ёки олти гол фарқи билан мағлуб бўлмаганимизга ҳам шукр қилиш керак. Неаполда умуман бошқача футбол бўлади. Агар «Реал» яна гол ура олса, унда ҳаммаси тамом.

Мен мураббий қарорларини муҳокама қилмайман. Унинг фикрлари ёқмай қолган тақдирида ҳам бу ҳақда ҳеч ким билмайди. Мухлислар эса аҳмоқ эмас. Агар сен мағлуб бўлсанг, бундай айбни кимга қўйиш мумкин ёки йўқлиги борасида қарор қабул қилишинг керак.

Жамоанинг янги футболчилари нима сабабдан мавсум сўнггига келиб ўйнамаётганини тушунаётганим йўқ. Агар буни вақтида билганимда, улар учун сарф этилган пулларни бошқа мақсадларга йўналтирган бўлардим.

Аурелио Де Лаурентис, «Наполи» президенти

Жамоани мен шуғуллантираман ва таркибни ҳам ўзим танлайман. Президент бу борада ўз фикрини билдиришга ҳақли, бироқ буни мен билан алоҳида суҳбатда айтгани маъқул. Шунда ҳам якуний қарор барибир ўзимда қолади.Маурицио Сарри, «Наполи» бош мураббийи

Футбол шундай нарса. Сен чиройлироқ ва кучлироқ ўйнашинг, эвазига эса рақиб гол уриб кетиши мумкин. Ўтказиб юборилган гол режаларимизга мос келмасди, шунга қарамай биз ўйин назоратини қўлимизда ушлаб турдик ва ҳисобни тенглаштирдик.

Ўйлашимча, ўйин натижаси ҳаққоний бўлди. Бироқ бу кейинги босқич учун етарли эмас.

Зинедин Зидан, «Реал Мадрид» бош мураббийи

Лоренцо Инсинье

Чамаси 35 метрлар узоқликдан «Реал» дарвозасига гол урган италиялик футболчи «Қироллик клуби» статистикасига кичик ўзгартириш киритди. Чемпионлар лигасининг уй учрашувларида Мадрид клуби 2007 йил «Олимпиакос»дан 7-дақиқада гол ўтказиб юборганди. Шундан кейин бу қадар тез фурсатда «Реал» дарвозасига йўл топиш иложсиз бўлиб келаётганди. Инсинье эса 8-дақиқага келибоқ ўз номини «Сантьяго Бернабеу» таблосига ёздириб қўйди.

«Реал» жаҳон ва Европа чемпиони эканини, Ла лигада пешқадам бўлиб турганини ҳамма яхши билардик. Шунга қарамай, биз яхши ўйнадик.

Натижа ҳафа қилади, бироқ курашни жавоб ўйинида давом эттирамиз. Бу ҳисоб «Реал» ва бизнинг орамиздаги фарқни кўрсатиб бериш учунгина хизмат қилади.

Биз кўп хато қилганимиз учунгина жазоландик. Ўзимизга ишонишда эса давом этамиз.

Лоренцо Инсинье, «Наполи» аъзоси

Бугун жамоага неаполча кўтаринкилик етишмади. Фақатгина шу шаҳардан бўлган Лоренцо Инсиньенинг ўйини менга ёқди, у ажойиб гол урди.

Қолганлар эса майдонда йўқолиб қолди. Худдики «Реал» юлдузлари уларни сеҳрлаб қўйгандек. Натижада амалда ҳеч нарса кўрсата олишмади.

Аурелио Де Лаурентис, «Наполи» президенти

Диего Армандо Марадона

«Наполи» клуби тарихида муҳим ўрин тутадиган аргентиналик футбол афсонаси «Реал»га қарши беллашув олдидан клуб ечиниш хонасига ташриф буюрди ва футболчилар билан суҳбатлашди.

Марадона футболчилар билан ярим дақиқа гаплашди. Унинг каби афсоналар футболчиларга куч бағишлаши мумкин.

Маурицио Сарри, «Наполи» бош мураббийи

Карим Бензема

«Наполи» дарвозасига биринчи голни урган Карим Бензема Чемпионлар лигасидаги муваффақиятли зарбалари сонини 51 тага етказиб олди ва бу борада франциялик бошқа бир ҳужумчи Тьери Анри кўрсаткичларидан ўзиб кетди. Шу тариқа Бензема мусобақада энг кўп тўп киритган франциялик футболчига айланди.

Рақиб мураккаб экани важидан ўйин қийин кечишини билгандик.

Менинг голим? Мен қандайдир янгилик қилишга тез-тез уриниб тураман. Агар ҳужумга чиқишимга тўғри келса, жамоамга фойда келтиришга мажбурман.

Бизнинг жуфтликда ҳали ҳеч нарса ҳал бўлгани йўқ. Бу ҳисоб етарли эмас. Аҳир «Наполи» кучли рақиб эканини бугун ҳам кўрсата олди.

Каземиро, «Реал» аъзоси