Шимолий Корея етакчиси Ким Чен Иннинг Малайзияда вафот этган акаси Ким Чон Намнинг суд-тиббиёт экспертизаси Куала-Лумпур марказий касалхонасида бўлиб ўтади. Бу ҳақда New Straits Times нашри ўз манбаларига таяниб хабар қилди, деб ёзади «ТАСС».

КХДР фуқароси 14 февраль куни пойтахт аэропортидан Путражая касалхонасига келтирилган, у ерда унинг ўлими қайд этилган эди. «Бироқ ушбу тиббий муассаса экспертиза ўтказиш учун тўғри келмайди», — дея нашрга маълум қилди касалхона вакили. Газета маълумотларига кўра, марҳумнинг жасади бугун, 15 февраль куни эрталаб тўртта полиция автомобили ҳамроҳлигида олиб кетилган. Гувоҳлар таъкидлашича, Путражая касалхонаси яқинида КХДРнинг Куала-Лумпурдаги элчихонаси вакиллари кўринмаган.

«ТАСС» мухбирига Малайзия полицияси матбуот хизмати ходими мурда кун давомида ёрилиб ўрганилиши, кечки пайт эса суд-тиббиёт экспертизаси натижалари ҳақида матбуот анжумани ёки матбуот учун баёнот ташкиллаштирилишини маълум қилган эди.

Аввалроқ КХДР етакчиси Ким Чен Иннинг ўгай акаси Ким Чон Нам Малайзияда ўлдириб кетилгани хабар берилган эди. Ким Чон Нам Малайзия аэропортида ўлдириб кетилган. Унга икки аёл ҳужум қилган, улар «заҳарланган игна»лардан фойдаланган.

Жанубий Кореяда эса КХДР етакчиси Ким Чен Ин акасининг ўлимини муҳокама қилиш учун Миллий хавфсизлик кенгаши мажлиси бўлиб ўтади.